بفكر فعلا لو فى مكان اقدر اروح له و ابعد عن طوفان الغل القادم ـــ طبعا الفكره دى جديده جدا عليا و عمرى ما فكرت فيها و ده فى حد ذاته مؤشر مش لطيف بالمره ــ طيب لو ممكن يبقى فى حاجه كده فعلا انا ممكن آخد ايه معايا ؟؟
قعدت فكرت فى الحاجات اللى هآخدها معايا سجادة الصلاه بتاعتى و المصحف و السبحه الخشب طبعا ... هدومى و البالطو بتاع ماما و نضارة بابا و صورى مع اخويا فى كل مراحل عمرنا ... طبعا كنت اتمنى آخد معايا اولادى و احفادى و اصحابى لكن طول عمرى مبحبش افرض اختياراتى على حد .... كتبى كلها و عفيفى " اللاب توب بتاعى " و " خير ان شاء الله " موبايلى القديم و " اللى ما يتسماش " موبايلى الجديد و " اولجا " عروستى ( بقالها معايا 44 سنه يعنى عشرة عمر مش هقدر اسيبها ) هديه من شخص عزيز محدش يعرف تاريخها غيرى
... طبعا اغانى محمد فوزى كلها و اغانى محمد منير كلها برضه و شويه من ام كلثوم و كتير من اغانى عبد الحليم و انغام و فيروز و ورده و الشريط الاخير ل عمرو دياب ... موسيقى عمر خيرت و عبد الوهاب و عمار الشريعى ... مسرحيات فؤاد المهندس و افلام فاتن حمامه و فيلم عروب و شروق و القاهره 30 و شفيقه و متولى لسعاد حسنى .... مونولوجات اسماعيل ياسين و افلام انور وجدى و ليلى مراد ... اغانى اسمهان و عبد المطلب ... مسلسلات اسامه انور عكاشه و موشحات الشيخ النقشبندى ... تسجيلات الشيخ محمد رفعت و الشيخ عبد الباسط .. فانوس صفيح من ابو شمعه و المسحراتى بصوت سيد مكاوى
... تابلوهات فريد فاضل و لوحات صلاح طاهر و بورتريهات بيكار ... برنامج غنوه و حدوته و غواص فى بحر النغم و احاديث الشيخ الشعراوي
... نعناع و ليمون و ملوخيه و شجرة برتقال و ياسمين و شجرة بونسيانا و شجرة توت و ساقيه و ترعه ... النيل و الهرم و مسجد السلطان حسن ... حاسه برضه انى ناسيه حاجات كتير
... طيب لو عرفت آخد الحاجات دى و الحاجات اللى ناسياها افتكرتها و اخدتها هعرف آخد الروايح ازاى ؟؟ ازاى هعرف آخد ريحة البحر ساعة العصارى ؟؟ ازاى هعرف آخد ريحة شوارع بورسعيد ؟؟ ازاى هعرف آخد ريحة البخور اللى فى منطقة الحسين و الغوريه و خان الخليلى ؟؟ طيب ازاى هآخد ريحة الهوا فى بلكونتى ساعة الفجريه ؟؟
عاجبك كده يا مصر ؟؟ عاجبك اللخبطه اللى انا فيها دى ؟؟
* البورتريه تصوير لشخصية مصر بريشة العبقرى حجازى
