ليس حباً فى على و لكن كرهاً فى معاويه ..... بقلمى أنا

عندما يطفح الكيل ... عندما يزداد الفساد ..عندما تهدر الكرامه ...عندما يستشرى الظلم ...عندما يزداد الاحباط ... عندما ننعم بحريه زائفه و انجازات وهميه .... عندما يُستخف بالعقول ..و عندما... و عندما .....و عندما .... أجد نفسى لا إرادياً أحتمى بمسرحيه كوميديه أو فيلم قديم  ابيض و اسود و حبذا لو كان فيلم غنائى 

و فى ايامنا هذه الحالكة السواد وجدت ضالتى فى مسرحيه كوميديه اسمها " شارع محمد على " و للصدفه العجيبه تحتوى هذه المسرحيه على مشهد غنائى  للمنتصر بالله يحكى فيه عن شخص رذل يجلس فى السينما مع صديقه و يراهنه انه سيضرب الرجل الجالس فى المقدمه على قفاه مقابل 50 جنيه و يذهب بالفعل و يسكع المحترم القفا المتين فينزعج الرجل جدا و يلتفت فيجد الرجل الرذل يقول له فى خبث آآآآسف جدا افتكرتك صاحبى اللى من زمان مشوفتوش فيبتسم له الرجل المحترم و يسامحه و يفوز هو بقيمة الرهان و بعد قليل يكرر  نفس الفعل مقابل نفس الرهان و عندما ينتفض الرجل المحترم فإنه يعتذر له بحراره مؤكدا له انه شبه صديقه و يكاد يكون نسخه مكرره بالكربون فيسامحه الرجل المحترم على ان ينتبه فى المره القادمه و يعود الرذل و يتناول قيمة الرهان و بعد قليل يؤكد لصديقه انه مستعد لتكرار نفس العمل لثالث مره فيعاود الكره مقابل زيادة قيمة الرهان فيوافق صديقه فيقوم ويذهب لنفس الرجل و يسكعه قلم محترم بيستشيط الرجل غضبا و يقوم وهو مصمم على رد القلم فيبتسم الرذل فى سماجه و يقول للرجل بمنتهى البرود : بقول لك ايييه بص انت سكت فى المرتين اللى فاتوا و عديتها فوت بقى و مجتش على قفا كمان      

و قد كان ... الشعب مصمم ياخد القفا التالت من الرزل و يفوتهاله 

القفا  الاول كان قفا الاستفتاء بتاع اللى يقول لأ هيبقى كافر و يروح النار و اللى يقول نعم هيبقى مؤمن و يروح الجنه 

و القفا التانى كان قفا انتخابات مجلس الشعب اللى كلنا عارفين الاصوات اتلمت فيها ازاى ؟؟ و البركه طبعا فى الزيت و السكر و اللحمه .... مش عارفه ليه مكانوش بيوزعوا رز كمان علشان الطبخه تكمل 

نيجى بقى للقفا التالت اللى هو انتخابات الرئاسه و اللى اتحمسنا لها جدا و نزلنا و كنا مصدقين ان الحدايه هتحدف كتاكيت 

لكن انا آسفه جدا للحدايه اتضح انها بالفعل بتحدف كتاكيت او على الاقل حدفتنا احنا جموع الشعب المصرى بأسوأ كتكوتين من ولادها ... المرسى و شفشق أو بمعنى اصح الاستبن و البلوفر 

و بعد ما هوجة الدور الاول هبطت و العفره هديت و الصوره بقت اوضح اقدر اقول انه فعلا هى دى النتيجه المنطقيه لإنتخابات يشرف عليها العسكر .... ما هو مش معقول العسكر يجيبوا حد من مرشحى الثوره يقعد يقرفهم بقى و يبقى مش بتاع اتفاقيات من تحت الترابيزه و لا يقف لهم بقى و يقول لهم تعالوا حاسبونى .... لأ النتيجه الطبيعيه انهم يجيبوا حد يفضل تحت السيطره و يعرفوا يتفاهموا معاه و ده اللى هيوفره لهم واحد بس من الاتنين يا اما الاستبن او البلوفر  و اهو كده كده هتتربى يا شعب مالوش كبير علشان تحرموا تعملوا ثورات بعد كده

و الناس عماله تندب و تولول ـــ عادى ما هو شعبنا الجميل نكدى بطبعه و من يومه و هو يعشق الولوله و الندب و اللى مش مصدقنى يروح يشوف الاهرامات اللى هى فى الاساس مقابر و بعد اى حالة وفاه لازم  بيلبسوا السواد سنه و المعدده مهنه  مصريه معترف بيها تاريخيا ــ هنعمل ايه ؟؟؟؟ هننتخب مين؟؟؟؟ البتوع دول و لا البتوع التانيين؟؟؟    

طيب ايه بقى ؟؟؟ انا لا مع البتوع دول و لا مع البتوع التانيين ؟؟؟؟ على رأى صلاح جاهين ايه العمل فى الوقت دا يا صديق ؟؟؟ بنتى الصغيره مصممه على المقاطعه و ابنى عاوز يصوت تصويت انتقامى من الاخوان و يدى صوته ل شفيق و بنتى الكبيره و صديقى الذى اثق فيه و احترمه يحاولون اقناعى بالاستبن مع استعمال اكبر كميه من الليمون لمقاومة الغثيان المصاحب للعمليه الانتخابيه....... و انا محتاره جدا 

اوقات افكر فى المقاطعه و اتمنى ان يتبننى هذا النهج الاغلبيه من الشعب المصرى و افكر انه لو حصل ده هيبقى احسن انتقام من الرئيس الجديد ايا كان لأنه هييجى عن طريق نسبه بسيطه جدا من الشعب و وقتها نفضل بقى نعايره و نقول له يا ريس محدش عبره و لا نزل اختاره يا ريس ناجح بأصوات اقل من خمسين فى الميه يا فاشل يا فاشل يا فاشل يا عرة الرؤساء و هكذا بقى و القاموس مليان 

فكرت فى اختيار شفيق كيدا فى مرسى  لكن احتقرت نفسى جدا بعد احكام قضية حسنى و اعوانه و عملت حساب الشعب المصرى الغلبان اللى قفاه خلاص مبقاش يستحمل كفوف جديده الا بقى لو تم اكتشاف عقار جديد  متخصص فى علاج القفا 

فكرت طبعا فى اختيار مرسى و مع احترامى الكامل لشخصه الكريم الا انه فى الاول و الآخر مجرد عروسه ماريونيت فى يد جماعته و كيف اختاره كرئيس لمصر و هو فى نظر جماعته بديل للرجل الاول و كيف يطاوعنى قلبى و عقلى على انتخابه بعد ان اختار هو وجماعته الانحياز للعسكر ضد اهلهم و ناسهم

 بفكر جديا فى المقاطعه و على رأى بنتى الصغيره اللى فى الطالعه و النازله تقول لى قاااطع يا مؤمن ....اعتقد ان ضميرى هيكون مستريح لما اقاطع و لا هو على رأى اللى قال ليس حبا فى على و لكن كرها فى معاويه او ببساطه شديده ليس حبا فى البتوع و لكن كرها فى فى البتوع التانيين ..... هو انا يعنى لازم ادى ل متآمر علشان ما اديش ل قاتل ؟؟ انا بقى شايفه انه لا ده و لا ده يلزمونا و يغور اللبن من وش البهيمه العكر