اسمع شكوى احدى الصديقات من والدتها و كيف انها تطلب الدخول الى الحمام عشر مرات فى النصف ساعه بدون حاجه حقيقيه لذلك فضلا عن انها ــ الام ــ دائمة الشكوى لزوارها من الجوع القارص و كيف ان ابنتها لا تقدم لها الطعام و طبعا هذا غير صحيح بالمره حيث اننى بنفسى شاهده على اهتمام صديقتى البالغ بوالدتها المشكله هنا ان والدة صديقتى هذه مُقنعه جدا فى شكواها لدرجه تُصور للسامعين ان حياتها مع ريا و سكينه كانت ستكون ارحم من حياتها مع ابنتها بكثير
اتذكر قريبتى المُسنه ــ رحمها الله ــ و اتذكر كيف تحولت جلساتنا فى العشر سنوات الاخيره من حياتها الى احاديث عن مدرسة نبويه موسى بالاسكندريه و مسيو بيير اللى كان شغال فى محل الاحذيه فى محطة الرمل و ازاى فضل اسبوعين شايل لها جوز الجزمه الايطالى ابو كعب احمر فى اسود لغاية ماراحت و اشترته منه و عن التورته اللى مامتها عملتها لها مخصوص علشان تاكلها مع صاحباتها فى فسحة الاكل بمناسبة عيد ميلادها هذا طبعا غير حاجب المحكمه اللى كان بيروح يحجز لهم فى السينما و الأيس كريم اللى كان باباها بيبعته لهم من النادى و هما فى السينما .... كل ده كويس و جميل جدا لكن كنت بخاف عليها اوى لما تسرح شويه و الاقيها تقول لى ان انكل اللى هو جوزها اتجوز عليها مع العلم ان انكل فى الوقت ده كان انتقل لرحمة الله من اكتر من تلات سنين و فى احدى المرات سألتها عن الست التانيه و قلت لها هى فين يا طنط عاوزه اتعرف عليها ؟؟؟ و مع انها كانت بتحبنى جدا الا انها زغرت لى بغضب و قالت ليه ان شاء الله هتصاحبيها ؟؟ طبعا رحت قايلالها بسرعه هى مين دى يا طنط اللى اصاحبها دا انا حتى سامعه انها بيئه و مش اد كده دا بس من باب الفضول مش اكتر
اعتقد انه ما من احد منا الا و جلس الى القريب الكبير او القريبه المتقدمه فى السن و استمع الى الحكايه المعاده عشرات المرات بل مئات المرات بنفس طريقة السرد و اللزمات و الوقفات و استمتع بأدق التفاصيل و ان تداخل بعضها فى بعض فبيكون من تأثير صدأ تروس الذاكره و نعومة حوافها نتيجه لكثرة الاستخدام .. و كم تعجبنا جميعا من تذكر الكبار للماضى البعيد بكل احداثه و ايام الطفوله و التلمذه و العقاب بالمسطره و تكشيرة جبين الاب و شخللة الام بغوايشها الدهب و هى بتعمل القهوه على السبرتايه ساعة العصارى و هواء المندره و تكعيبة البيت الكبير و حباية المانجو ام بذرتين .... مع ان نفس الشخص لو سألته أخدت الدوا الصبح هيقول لك معرفش .... نسيت
اسمع و اشاهد و اتذكر و أعرف بالطبع انها كلها أعراض مختلفه لمرض واحد اللى هو الألزهايمر وقانا الله و اياكم شره فأحمد الله حمدا كثيرا ان الوالد و الوالده حينما ذهبا كانا فى ازهى صورهم و ابهى حالاتهم مكتملين جسديا و نفسيا و عقليا و ادعو الله ان يُحسن خاتمتى و خاتمة المسلمين اجمعين
و من باب اعرف عدوك اجرى على النت و اقرأ كثيرا عن الالزهايمر و طرق الوقايه منه و تجنبه قدر الامكان فأفطر مكسرات و اتغذى سبانخ و اتعشى سمك و ما بين هذا و داك لا اترك مربع للكلمات المتقاطعه يمر من امامى دون ان احله و احاول حفظ القرآن الكريم و اراجع باستمرار فى ذاكرتى ابيات الشعر التى احفظها و اقرأ كثيرا و ادعو الله عقب كل صلاه ..... يارب اجعلنى خفيفه ظريفه لطيفه واعيه بروحى و حواسى و كلامى و خطواتى الى ان تقبضنى اليك بدون كرمشه و خروشه و هشاشه ....يارب لا تكلنى فى قيامى و قعودى الى غيرى حتى و لو كان اقرب الناس الى قلبى .....يارب لاتمسح شاشة عقلى ب زهايمر مفاجئ او شرايين عنيده متصلبه او كوليسترول بيهزر هزار بايخ ..... يارب اجعلنى اتذكر امسى و يومى و غدى و باسوورد الفيس بوك و الايميل .... يارب لا تخلط فى ذهنى الاحداث و الناس و التواريخ و الاسماء و الحقائق و الاحلام و الاوهام ......يارب متسيبنيش لغاية ما ييجى عليا يوم احط فيه النضاره فى التلاجه و الموبايل فى فرن البوتاجاز
ياللا ما علينا اخذنى الكلام عن الألزهايمر و النسيان و لم احدثكم بعد عن الموضوع الرئيسى للنوت اللى هو ...اللى هو ... يا نهار ابيض ....
...... هو انا كنت بكتب النوت دى ليه بقى ؟؟؟؟ ليه ليه ليه .... حد يفكرنى يا جماعه
يـــــــــــــارب فكرنى
No comments:
Post a Comment