سنه راحــت ..... بقلمى أنــــا

سنه راحت عاشت  ويانا كل الحكايات .... سنه جايه جديده بتندهنا شايله لنا حاجات 

2012 حيرتينا و تعبتينا و وجعتينا و لخبطتينا و قهرتينا من الحزن و الكبت ..... عاجبك كده ؟؟؟

و مع ذلك مقدرش انكر برضه اننا  فى ايامك ضحكنا و غنينا و فرحنا و رقصنا و اتمنينا الخير للغير و قربنا من بعض و تواصلنا مع اصحابنا و حبايبنا و  قرايبنا .... قرأنا كتب كتير و لسه اكتر مستنى دوره .... كتبنا و عبرنا عن مشاعرنا .... اندهشنا و اتفاجئنا اندهاشات جميله و مفاجآت محببه للنفس .... سمعنا اغانى و شوفنا افلام و استمتعنا بصحبة احباءنا و اولادنا و اصحابنا .... خرجنا و اتفسحنا و حضرنا افراح و اشترينا حاجات كتير ..... شربنا قهوه و شاى بالنعناع و سمعنا فيروز و اليسا و حليم و منير و ........ مرت علينا ايام كتير سعيده و حنونه و دافيه تستاهل نفتكرها بكل خير و سعاده و تستاهل نشكرها على مفاجآتها الجميله

النهارده بنقول باى ل 2012 بكل ايامها و اللى حصل فيها  و بنقول اهلا ل 2013  أدعو الله و أتمنى ان تكون ايامها اجمل و احن و ادفأ ... ان تكون ايامها اكثر طيبه و اكثر رفقا بينا .... أدعو الله ان نكون فى العام الجديد اكثر قربا من الله و اكثر حبا لله ... أدعو الله ان تأتى ايام العام القادم و معها الشفاء لكل مريض ... و الامان لكل خائف ... و الدفا لكل بردان ... و الشبع لكل جوعان ...  أدعو الله ل حبيبتى اللى واجعه قلبى مــــصــــــر انها تكون احسن بلد فى الدنيا ــ صحيح مش عارفه ازاى بس اهو بقى ــ صحيح انا مش عارفه الدنيا مودياها على فين لكن عندى ثقه فى الله انها لن تضيع ابدا     

كل سنه و كل الناس طيبين و عقبال سنين كتير جايين ان شاء الله

  * ملحوظه على الهامش : هتعملوا ايه فى رأس السنه ؟؟؟ سؤال مكرر و ممل و الناس اتعودت تسأله لبعض بدون تفكير و بعض الناس تشعر بالاحراج لأنهم مش سهرانين بره البيت او مسافرين مش عارفه فين و فين و انا الصراحه بشوف الموضوع ابسط من كده بكتير و مش لازم ابدا نكون عازمين او معزومين او مسافرين او سهرانين المهم اولا و اخيرا هو  ان نكون راضيين و قانعين بحياتنا اياً كانت ف اولا و اخيرا كل انسان له طقوسه التى تسعده و تعبر عنه بطريقة او بأخرى ...