شـــكراً لســاعى البـــريد

.. فى يوم من ذات الايام جمعت العصفوره الام ولادها و قالت لهم : اسمعوا يا ولادى انا خارجه دلوقتى هطير اجيب لكم حبوب و فاكهه للفطار و مش هتأخر عليكوا بس انتوا اقعدوا ساكتين و متعملوش شقاوه لغاية ما آجى

العصافير الصغيرين قالوا لها : حاضر يا ماما بس متتأخريش علينا

قالت لهم : حاضر و طارت و سابتهم

فاتت ساعه و كمان ساعه و العصافير مستنيين و بعدها فاتت ساعات كتير و العصافير برضه مستنيين بس كانوا ابتدوا يجوعوا ... مامتهم اتأخرت فعلا .. و ابتدت العصفوره الصغيره تعيط و قالت ل إخواتها : انا عاوزه ماما هاتولى ماما ..... أخوها الكبير حاول يسكتها و يلاعبها ف قالت له : انا هلعب معاك بس هفضل اعيط لغاية ما تيجى ماما

اخوها قال لها : ماما هتيجى كمان شويه متعيطيش ...... فات الوقت و قالت له : ( كمان شويه ) خلصت من زمان و ماما لسه مجاتش .... اكتبوا جواب ل ماما علشان تيجى .. الفكره عجبت اخوها اوى و قال : فكره جميله ياللا كلنا نكتب جواب ل ماما بسرعه هاتولى ورقة شجر خضرا كبيره

جابو له الورقه و كتب الجواب و كتب اسمه و خلا اخواته العصافير يكتبوا اساميهم بمناقيرهم الصغننه على الورقه ..... لكن فضلت مشكله ... هيبعتوا الجواب على فين ؟؟؟ هما ميعرفوش عنوان مامتهم

رجعت العصفوره الصغيره تعيط ف اخوها طبطب عليها بجناحه و قال لها خلاص متعيطيش انا هلاقى طريقه

العصفور الاخ فضل يفكر شويه و هو واقف على باب العشه .... و هو واقف كده شاف الفيل ابو زلومه رايح يستحمى فى البحيره ف قال له : يا فيل يا كبير يا اعظم حيوانات الغابه ... ممكن تساعد عصافير مساكين مامتهم غابت عنهم من الصبح و لسه مرجعتش ؟؟

الفيل اهتم جدا و طرطق ودانه الكبيره اللى شكل المروحه و قال له : اقدر اساعدكم ازاى ؟؟

طار العصفور و وقف على راس الفيل و همس له فى ودنه و قال له : اختى الصغيره عماله تعيط عاوزه ماما و احنا كتبنا جواب ل ماما و عاوزين حضرتك توصله لها  بس احنا منعرفش عنوانها فين

ضحك اوى الفيل لدرجة ان العصفور طار من على راسه و قال بصوته العالى : هاهاهاها انا كمان معرفش مامتكم فين و لا حتى اعرفها هى مين من العصافير .... الدنيا يا ابنى مليانه عصافير و العصافير كلهم شكل بعض

بسرعه رد عليه العصفور و قال له : بس انا عارفها

رد عليه الفيل و قال له : طبعا لازم تكون عارفها ... انا كمان عارف مامتى لكن انا فيل كبير و عجوز و حركتى بطيئه على ما ادور على مامتك كانت فاتت سنين كتير

سكت العصفور و هو حزين و قال : بس اختى بتعيط و عاوزه ماما

بص له الفيل فى عطف و قال له : طيب انا عندى فكره ... ايه رأيك تبعت جوابك مع الشمس ؟؟؟ الشمس عاليه و بعيده اوى و هى فوق شايفه كل العصافير و الافيال و اكيد هتكون عارفه ماما و عارفه هى فين

فرح اوى العصفور و جرى على اخواته علشان يفرحهم هما كمان لكن فضلت فى مشكله بص للفيل فى حيره و سأله : طيب ازاى اوصل جوابى للشمس

بص له الفيل و قال له : يا سلام دى بسيطه اوى ابعت للشمس قول لها تيجى و هى تيجى تاخد الجواب

طار العصفور من الفرحه و راح يطمن اخته الصغيره اللى كانت رجعت تعيط تانى

فرحوا العصافير اوى و جريت العصفوره الصغيره و جابت ورقه خضرا علشان يكتبوا جواب للشمس علشان تيجى تاخد جوابهم ل ماما و فعلا كتبوا الجواب لكن العصفوره بصت لأخوها و قالت له : هو حضرة الفيل قال لك ازاى نبعت جواب الشمس للشمس ؟؟؟

سكت العصفور شويه و قال : لأ ..... و قبل ما تعيط تانى قال لها ما تعيطيش انا عارف مين اللى هيوصل الجواب ..... صديقنا القرد
مافيش غيره هو خفيف و سريع الحركه و ممكن يوصل للشمس

وقف العصفور على باب العشه لغاية ما شاف القرد و شرح له القصه و ما فيها ف القرد رد عليه و قال له : انت ساذج اوى يا عصفور انت فاكر الشمس فوق الشجره دى ؟؟؟ دى الشمس دى بعيده اوى بس عارف مين يقدر يوصل لها ؟؟؟ السحاب  ابعت له جواب ييجى و هو يوصل جابك للشمس

و جرى القرد و ساب العصفور فى حيره شديده طيب يبعت جواب للسحاب ازاى ؟؟

رجع العصفور للعشه تانى و حكى اللى حصل لإخواته و قال لهم هاتولى ورقه تانيه نكتب عليها جواب للسحاب

كتبوا الجواب للسحاب و العصفوره الصغيره سألت اخوها فى براءه : طيب مين هيوصل الجواب للسحاب ؟؟؟ 

طبطب اخوها على ريشها فى حنان و قال لها هنتصرف متخافيش

وقف العصفور محتار على باب العشه و شاف طفل صغير جميل معدى ف سأله فى حيره : متعرفش ازاى عصفور يبعت جواب للسحاب ؟؟؟ الولد بص له و قال له انا اعرف ازاى ابعت جواب لواحد صاحبى ...... بس عارف مدام الجواب للسحاب ليه متبعتوش مع الرياح اصل هى بس اللى تقدر توصل للسحاب

العصفور كان اتعلم الدرس و قرر قبل ما يرجع لإخواته يسأل الولد عن ازاى يوصل رسالته للريح ؟؟ ابتسم الولد ابتسامه جميله و قال له : انت مش محتاج يا عصفورى الجميل .... الرياح حواليك فى كل مكان و بتلاعب ريشك الجميل قول لها كل اللى انت عاوزه و هى هتوصله

رجع العصفور بسرعه للعش و قال ل إخواته على اللى حصل و قال لهم هاتولى الجوابات اللى كتبناها و فتح شباك عالى فى العشه فى اتجاه الشمال و قال : يا رياح الشمال الصديقه احنا عصافير صغيره مامتنا غابت علينا من الصبح و احنا جعانين و اختى الصغيره بتعيط و عاوزه ماما ...... و رمى العصفور الجوابات فى الهوا .... لفوا لفه و اختفوا

اخته سألته : تفتكر الشمس هتقول لماما ... رد عليها فى ثقه و قال لها : اكيد

كانت الشمس قربت تمشى من عندهم علشان تروح تنور الدنيا عند عصافير تانيين

فجأه سمعوا صوت مامتهم بتناديهم العصفوره الصغيره قالت فى فرحه : ماما

بصوا لقيوا مامتهم فعلا عند باب العشه ف جريت عليها العصفوره الصغيره و قال لها الشمس وصلت لك الجواب يا ماما ؟؟ و لأن ماما مكنتش عارفه الحكايه ف العصفور الكبير غمز لها بعينه ف حضنت العصفوره الصغيره و قالت لها ايوه فعلا الجواب وصلنى و الشمس قالت لى انك كنتى بتعيطى و قالت لى اجرى طيرى بسرعه روحى قبل ما اغيب

فرحت اوى العصفوره الصغيره و قعدت تاكل و بصت لمامتها و قالت لها : و الشمس قالت لك انى كنت بعيط ؟؟ يااه ... دى الشمس دى بتعرف كل حاجه

و يا ترى الشمس قالت لك كمان : انى بحبك اوى ؟؟
............................................

ـــــ و دى كانت حكاية رساله الى الشمس مستوحاه من قصه للاطفال بنفس الاسم من تأليف الروائى سمير عبد الباقى و كانت جدتى بتحكيها ليا بنفس الطريقه :)
.....................................

آخر سطر  : يا ترى الشمس قالت لك انى بحبك أوى ؟؟؟